Азийн хөгжлийн банкны техникийн туслалцааны хүрээнд Улсын бүртгэлийн ерөнхий газарт хэрэгжиж буй “Нийгмийн үйлчилгээний хүртээмжийг сайжруулах зорилгоор бүртгэлийн системийг боловсронгуй болгох төсөл”-ийн хүрээнд хийж хэрэгжүүлж буй ажлын явцын талаар талууд өнөөдөр /2021.06.21/ цахим уулзалт хийлээ. Уулзалтад УБЕГ-ын дарга Д.Дэлгэрсайхан, Тамгын газрын дарга Г.Цолмон, Мэдээллийн технологийн газрын дарга П.Нэргүй, Азийн хөгжлийн банкны Монгол дахь Дэд суурин төлөөлөгч бөгөөд Төслийн удирдагч, Ахлах эдийн засагч Деклан Магий, төслийн зохицуулагч Г.Пүрэвсүрэн болон холбогдох албаны хүмүүс оролцлоо.
Уулзалтаар төсөл хэрэгжилтийн хугацаа энэ оны 08 дугаар сард дуусах гэж байгаатай холбогдуулан уг төслийн хэрэгжилт ямар шатанд байгаа талаар ерөнхий танилцуулгыг хүргэж, хүний нөөц, сургалтын систем хөгжүүлэх ажлын явц болоод төсөл дуусахаас өмнө хэрэгжихээр төлөвлөсөн бусад ажлууд, мөн цаашид авах арга хэмжээний талаар дэлгэрэнгүй ярилцаж, санал солилцсон юм.
“Нийгмийн үйлчилгээний хүртээмжийг сайжруулах зорилгоор бүртгэлийн системийг боловсронгуй болгох төсөл” нь 2017 оны 09 дүгээр сараас эхлэн хэрэгжиж эхэлсэн бөгөөд энэ онд Улсын бүртгэлийн байгууллагын хүний нөөцийн удирдлага, цахим сургалтын нэгдсэн систем хөгжүүлэх, чадавхийг бэхжүүлэх сургалтууд, цахим болон видео хичээл бэлтгэн боловсруулах, Иргэний улсын бүртгэлийн архивыг тохижуулж, хүний нөөцийн удирдлага, цахим сургалтын системд шаардлагатай тоног төхөөрөмж худалдан авах зэрэг томоохон ажлуудыг төлөвлөн, хэрэгжилтийг ханган ажиллаж байна. Түүнчлэн, төсөл дуусах хүртэл хугацаанд Улсын бүртгэлийн байгууллагын удирдах ажилтны сургалт, иргэний бүртгэлийн болон мэдээллийн технологийн албан хаагчдад зориулсан сургалт, бүсийн сургалт, төслийн хаалтын семинарыг тус тус хуваарийн дагуу зохион байгуулахаар төлөвлөөд байна.
