Монгол улсын Ерөнхий сайдын ивээл дор Бүгд Найрамдах Улс тунхагласны түүхэн ойн өдрийн тохиолдуулан зохион байгуулдаг “Иргэний андгай өргөх ёслол”- ийн арга хэмжээг улсын бүртгэлийн хэлтсийн дэргэдэх эцэг эхийн зөвлөл, аймгийн ЗДТГ, Соёл, урлаг, аялал жуулчлал, залуучуудын газартай хамтран зохион байгууллаа. Тус арга хэмжээнд Эрдэнэбулган сумын 16 нас хүрч байгаа залуу үеийн төлөөлөл сурагчид оролцож иргэний үнэмлэхээ хүндэтгэлтэйгээр гардан авлаа. Энэ үеэр иргэний үнэмлэхээ гардан авч байгаа залуучуудад иргэний үнэмлэхийн ач холбогдол, үнэ цэнэ, хэрэглээний талаар мэдээлэл өглөө. Залуу үеийнхэнд төр улсаа эрхэмлэн дээдлэх, эх орон ард түмнийхээ өмнө хүлээсэн эрх үүрэг, хариуцлагаа ухамсарлан чин шударгаар амьдрах үзлийг төлөвшүүлэхэд дэмжлэг үзүүлэх нь энэхүү арга хэмжээний зорилго юм.
